記得2011年時日本發生大地震時，最令筆者印象深刻係中國式「盲搶鹽」。當時網上出現傳言指碘鹽可以對抗輻射，令內地出現搶鹽情況，令食鹽價格炒高一倍。再到2013年時內地大媽搶完鹽，又出現中國式「盲搶金潮」，香港金鋪前線銷售人員樂在其中，周氏金鋪業績亮麗。
踏入2015年，搶金熱潮減退，內地開始進入「盲搶股」大時代。上星期上證綜合指數創7年新高報 3800點，滬深兩市成交金額達11,310億元。據中國結算公司公佈，上周新開股票戶口達167萬個，創出歷史新高，已經打破2007年6月1日該周的162萬開戶紀錄。上星期出席老表於內地舉行的婚禮，兄弟團得知我都係熱愛玩股票，就問我對近期內地股市有咩意見，仲叫我比個「冧把」佢地。
「冧把」就無比到佢地，但內地股市暢旺，滬深兩市成交金額急升，證券帳戶開戶人數大幅增長，股票市場參與者增加，最當炒及受惠的公司一定是中資劵商股如中信證券 (6030), 海通證劵 (6837)。而滬深港將於今年三地互聯互通，港交所(388)擔當港未來“共同市場”模式的重要角色，具長線投資價值。當深港通於今年下半年正式開通，股民於香港劵商開立證券戶口，投資者便可以同時投資香港、深圳、上海三地市場，投資靈活便利同時亦享免稅，於香港設立子公司的中資劵商亦會從中受惠，如國泰君安(1788), 海通國際(665)。
大陸式盲搶方式早於2011年出現，搶鹽搶金到搶股，教曉大家中國式風格就係羊群心理，愈高愈搶，不重理性分析及基本因素。投資A股千萬不要跟內地股民說市盈率，股息率或市脹率，他們只要股票升幅率夠牛便可以了，正所謂「唔理科網股定係銀行股，只要有升幅就係好股」。股票市場是零和遊戲，有市場得益者便有輸家。進入盲搶股既大時代，個個都可以係贏家，但懂得定立止賺位，見好就收，方為真贏家，你想做大媽定係真贏家，其實只係一線之差。
